Қазақ кино өнерінің қарашаңырағы саналатын Шәкен Айманов атындағы «Қазақфильм» киностудиясының 85 жылдығына орай Қазалы ауданында тағылымы мол, өнерге тұнған тағылымды шара өтті. Аудандық деңгейде ұйымдастырылған «Қазақфильм: тарихтан тағылым, өнерден өнеге» атты драма байқауы – ұлттық кино мұрасын ұлықтап, жас өнерпаздардың шығармашылық әлеуетін танытуға бағытталған маңызды мәдени оқиғалардың бірі болды.
Аталған байқау Қазалы ауданының мәдениет және тілдерді дамыту бөлімінің қолдауымен, Сарыкөл ауылдық округі әкімі аппаратының «Абай ауылдық клубы» мемлекеттік коммуналдық қазыналық кәсіпорнының ұйымдастыруымен жоғары деңгейде өткізілді. Өнер додасына аудан көлеміндегі ауылдық клубтар жанындағы драма үйірмелері қатысып, қазақ киносының жауһар туындыларын сахна тілімен сөйлетті.
Солардың қатарында Лақалы ауылдық клубы жанындағы драма үйірмесі де өз өнерін ортаға салып, көрерменнің ыстық ықыласына бөленді. Үйірме мүшелері қазақ әдебиеті мен кино өнерінде өзіндік орны бар жазушы Жүсіпбек Қорғасбектің «Жансебіл» шығармасы желісі бойынша түсірілген кино негізінде сахналық көрініс ұсынды.
Қойылымның ерекшелігі – шығарманың мазмұнын жай баяндап қана қоймай, кейіпкерлердің ішкі жан дүниесін, психологиялық толғанысын, тағдыр тәлкегін терең ашуында болды. Сахнадағы әрбір қимыл, әрбір сөз көрермен жүрегіне жол тауып, шынайы эмоция мен әсерге бөледі. Актерлік шеберлік пен сахналық мәдениет үйлесім тапқан бұл көрініс көпшіліктің көңілінен шығып, қазылар алқасының да жоғары бағасына ие болды.
Кейіпкерлерді сомдаған жас өнерпаздар өз рөлдерін барынша нанымды жеткізе білді. Атап айтқанда, басты кейіпкер Мұқатай рөліндегі Әли Шәріптің бейнесі – ішкі қайшылығы мол, тағдырлы кейіпкерді шеберлікпен ашуымен ерекшеленсе, Маруся рөліндегі Ұлдана Ерімбетқызы нәзіктік пен қайсарлықты үйлестіре білді.
Бұл қойылым – тек өнер көрсету ғана емес, сонымен қатар ұлттық кино мен әдебиеттің үндестігін, рухани сабақтастығын айқын көрсеткен туынды болды. Жас өнерпаздар арқылы өткеннің өнегесі бүгінгі күнмен байланысып, көрерменге терең ой салды.
Байқау қорытындысы бойынша Лақалы ауылдық клубы жанындағы драма үйірмесі жоғары деңгейдегі өнер көрсеткені үшін жүлделі І орынды иеленіп, үлкен жетістікке қол жеткізді. Бұл – ұжымның табанды еңбегі мен шығармашылық ізденісінің айқын нәтижесі.
Үйірме жетекшісі Айнұр Мейрамбайқызының еңбегі ерекше атап өтуге тұрарлық. Ол жас таланттарды тәрбиелеуде, олардың сахна мәдениетін қалыптастыруда аянбай еңбек етіп, өнерге деген сүйіспеншілікті жүректеріне ұялата білді. Осындай білікті жетекшінің бағыт-бағдарымен өнерпаздар биік белестерді бағындырып келеді.
Қорытындылай келе, бұл байқау – ұлттық өнерді дәріптеп қана қоймай, жас буынның рухани дамуына серпін берген маңызды мәдени шара болды. «Қазақфильм» киностудиясының бай мұрасы – бүгінгі ұрпақ үшін сарқылмас қазына. Ал сол қазынаны сахнада жаңғыртып, көрерменге жеткізе білген өнерпаздардың еңбегі қашанда жоғары бағалауға лайық.
Алтынай АЛМАС.
