Ауылдық жерлерде кәсіпкерлікті дамыту – «AMANAT» партиясының негізгі бағыттарының бірі. Осы ретте «Ауыл аманаты» жобасы тұрғындардың өз ісін бастауға, оны кеңейтіп, табысын арттыруға мүмкіндік беріп отыр. Нақты кезеңде осы жобаның игілігін көріп отырғандардың бірі – Арал қаласының тұрғыны Гүлсая Әбілдаева.
Кәсіпкер өткен жылы 9,8 миллион теңге жеңілдетілген несие алып, отағасы Сәбит Атақұловпен бірге пластик өнімдерін өндіретін шағын цехтың жұмысын жандандырды. Айта кетейік, бұл отбасы үшін аталған кәсіп таңсық емес. Кейінгі 10 жылдан бері осы салада еңбек етіп, тәжірибе жинақтаған. Дегенмен өндірістік қуатты арттыратын заманауи құрал-жабдықтар сатып алу олардың көптен бергі арман еді. Аталған партияның ауыл халқының табысын арттыруға бағытталған «Ауыл аманаты» жобасы осы арманды жүзеге асырғалы отыр. Олар жылдық өсімі 2,5 пайыздық несие қаражатына түркиялық жоғары сападағы «Craft», «Yilmaz» маркалы заманауи құрылғы сатып алып, өндірісті толықтай жаңғыртты.
– Бұрын ұзақ уақытты қажет ететін өнім дайындау кезеңі бүгінде айтарлықтай қысқарып, небәрі 4–5 күннің ішінде сапалы өнім шығаруға мүмкіндік туып отыр. Бұл – уақыт үнемдеу ғана емес, сапаның жаңа деңгейге көтерілуі. Қазір цехта өндірілген өнімге сұраныс жоғары. Тапсырыс ауданның барлық елдімекендерінен ғана емес, облыстың өзге аудандарынан, тіпті іргелес Ақтөбе өңірінен де түсіп жатыр, – дейді Г.Әбілдаева.
Ол екі адамды жұмыспен қамтып отыр. Алдағы жоспары мұнан да ауқымды. Цех көлемін кеңейтіп, жаңа жұмыс орнын ашуды, өндіріс көлемін бірнеше есеге арттыруды көздейді.
– Ашығын айтанда «Ауыл аманаты» жобасы бізге үлкен көмек болды. Бұрын шағын көлемде жұмыс істесек, енді өндірісті кеңейтуге мүмкіндік туып отыр. Бастысы – халыққа сапалы өнім ұсынып, сұранысты толық қамтамасыз етуге мүмкіндік алдық, – дейді кәсіп иесі.
Расымен де бұл бастама бір отбасының табысы ғана емес, тұтас ауыл экономикасының дамуына қосылған үлес. Осындай нақты істер арқылы аудан, ауыл тұрғындарының кәсіпке деген қызығушылығы артып, еңбекке деген ынтасы күшейе түсуде. Мысалы, Арал ауданында 2023-2025 жылдары «AMANAT» партиясының «Ауыл аманаты» аясында жалпы құны 1 млрд 113 млн теңгені құрайтын 179 жоба қаржылай қолдауға ие болды. Өткен жылы 43 жоба іске қосылса, биыл тағы 85 жобаны жүзеге асыру көзделіп отыр.
Алтынай АЛМАС.
