Сол жағалаудағы үстел теннисі орталығында өткен облыстық «Qyzylorda Cup» турнирі өз мәресіне жетті. Екі күнге созылған жарыста облыстың барлық аудандары мен Қызылорда қаласынан жиналған 250-ге жуық спортшы өзара бақ сынап, үздіктерді анықтады.
Турнир ересектер, 2009-2011, 2012-2014 жылдары туған жасөспірімдер және 2015 жылы туған және одан кіші жасөспірімдер арасында ұйымдастырылды. Жарыстың басты мақсаты – жас теннисшілердің шеберлігін шыңдау, тәжірибе жинақтау және алдағы ірі жарыстарға үздік спортшыларды іріктеу болды.
Ашылу салтанатына облыстық дене шынықтыру, спорт және туризм басқармасының басшысы Бақтияр Артаев, облыстық үстел теннисі федерациясының президенті Болат Бакуов қатысып, спортшыларға сәттілік тіледі.
Жарыс барысында қатысушылар жоғары дайындық деңгейін көрсетіп, тартысты кездесулер өткізді. Әсіресе, жасөспірімдер арасындағы ойындарда болашағынан үміт күттіретін спортшылардың шеберлігі көзге түсті. Турнир алаңы тек жеңімпазды анықтайтын орын ғана емес, жас спортшылар үшін тәжірибе жинақтайтын және өз мүмкіндігін танытатын маңызды алаңға айналды.
Жарыс қорытындысы бойынша жалпы командалық есепте бірінші орынды Қызылорда қаласы иеленді. Екінші орын Қазалы ауданына бұйырса, үшінші орын Шиелі ауданының еншісіне тиді.
Нақты кезеңде Сыр өңірінде үстел теннисі қарқынды дамып келеді. Бұл бағытта жас спортшыларды қолдауға, олардың кәсіби деңгейін арттыруға ерекше көңіл бөлінуде. Ал «Qyzylorda Cup» секілді жарыстар – өңірдегі үстел теннисінің әлеуетін арттырып, болашақ чемпиондардың қалыптасуына жол ашатын маңызды спорттық алаңдардың бірі.
Бағлан АЙҒАЛИҰЛЫ.
