Көктемгі кезеңнің басталуымен табиғатта өрт қаупі арта түседі. Құрғақ шөптің көбеюі, желдің күшеюі және ауа температурасының жоғарылауы орман мен дала аумақтарында өрттің тез таралуына себеп болады. Осыған байланысты өрттің алдын алу – табиғатты сақтаудың маңызды шарттарының бірі. Осы талаптарды ескере отырып, 2026 жылға арналған мемлекеттік орман қоры жерлерінде өрт қаупі бар маусым белгіленді.
Бұйрыққа сәйкес, мемлекеттік орман қоры аумақтарында өрт қаупі бар маусым әр өңірде әртүрлі мерзімде басталады. Атап айтқанда, бірқатар мемлекеттік табиғи қорықтар мен ұлттық парктер үшін, соның ішінде Барсакелмес мемлекеттік табиғи қорығы орналасқан өңірлерде, өрт қаупі бар маусым 2026 жылғы 26 наурыздан бастап белгіленген. Ал солтүстік және орталық өңірлердегі бірқатар табиғи аумақтарда маусым 6 сәуірден, ал шығыс аймақтарда 13 сәуірден басталады.
Өрт қаупі бар кезеңде табиғатты қорғау мекемелерінің жұмысы күшейтіліп, алдын алу шараларына басымдық беріледі. Орман өрттерін дер кезінде анықтау, жедел хабарлау, кезекшілікті ұйымдастыру және ақпараттық мониторинг жүргізу секілді жұмыстар жүйелі түрде жүзеге асырылады. Сонымен қатар, орман қоры аумағына жақын орналасқан ауыл шаруашылығы жерлерінде шөп өртеу жағдайларын болдырмау және халық арасында түсіндіру жұмыстарын жүргізу міндеттеледі.
Табиғаттағы әрбір өрт – тек өсімдіктерге ғана емес, жануарлар дүниесіне де зор қауіп төндіреді. Сондықтан профилактикалық шараларды күшейту, жедел әрекет ету қызметтерінің дайын болуы және бұқаралық ақпарат құралдары арқылы тұрғындарды сақтыққа шақыру – өрттің алдын алудағы маңызды қадамдар болып табылады. Осы бағытта диспетчерлік қызметтің үздіксіз жұмысы қамтамасыз етіліп, орман өрттері туралы жедел ақпарат алмасу жүйесі ұйымдастырылады. Өрт қауіпсіздігін сақтау – тек жауапты мекемелердің ғана емес, әр азаматтың ортақ міндеті.
Табиғатты қорғау, орман мен дала алқаптарын өрттен сақтау – келешек ұрпаққа аманат. Сондықтан белгіленген өрт қауіпті маусымда қауіпсіздік талаптарын сақтау, ашық отты бақылаусыз қалдырмау және кез келген қауіп туралы дер кезінде хабарлау аса маңызды.
А.Есенова,
Барсакелмес мемлекеттік табиғи
қорығының бас инженері
