Сирияның Хасака провинциясында орналасқан Касрактағы АҚШ-тың ірі әскери базасынан сарбаздарды шығару жұмыстары басталып кетті.
Al Jazeera телеарнасы мұның бірнеше аптаға созылуы мүмкін екенін хабарлаған.
Телеарна тілшісі әскерилер Ирак Күрдістанына бағытталып жатқанын мәлім еткен. Дайындық уақытында Хасакадағы «Әл-Шаддади» базасы мен Дейр-эз-Зор провинциясындағы «Әл-Омар» аэродромынан ондаған әскери техника мен сарбаз Касракқа көшірілгені белгілі болды.
АҚШ әскері «Әл-Шаддади» базасындағы миссиясын 10 күннен аса уақытқа созылған операциядан кейін толық аяқтаған. Кейіннен нысан Вашингтонмен тікелей келісім негізінде Сирия армиясының бақылауына өтті.
Бұған дейін америкалық күштер Аль-Танф базасынан да шығарылды. Ол Иордания және Ирак шекарасына жақын орналасқан. Қазіргі уақытта америкалық және халықаралық коалиция күштері Хасака провинциясының солтүстік-шығысындағы Хараб әл-Джир базасында ғана қалды.
Осыған дейін АҚШ-тың ресми тұлғалары Сирия аумағынан шамамен 1000 әскери қызметкерді шығару жоспары бар екенін жасырмады.
