Бүгін Қазалы көлік-техникалық колледжінде «Әділетті және Прогрессивті Қазақстанның Халықтық Конституциясы үшін!» атты аумақтық коалиция өкілдерінің жаңа Конституция жобасын таныстыру және оның бағыт-бағдарын түсіндіруге арналған ақпараттық кездесуі өтті.
Іс-шараға аумақтық коалиция жетекшісі Ғазиз Әліш және коалиция мүшелері Нұрғиса Жалғасбаев мен Талғат Әліпбаев қатысты. Жиында жаңа Конституцияның дайындалу барысы мен маңыздылығы туралы айтылып, қолданыстағы заңмен салыстырғанда оның жаңашылдықтары, адамға бағдарланған сипаты, ұлттық болмыс пен тарихи жолға берілетін басымдық, сондай-ақ қоғамдағы әділеттілік пен жаңару талабын ескеретіндігі түсіндірілді.
Кездесуде сонымен қатар жаңа Конституцияның құрылымдық ерекшеліктері баяндалып, оның Преамбуладан, 11 бөлім мен 96 баптан тұратыны, сондай-ақ «Қазақстан Халық Кеңесі» мен «Конституцияға өзгерістер мен толықтырулар енгізу» деген екі жаңа бөлімнің қосылғаны айтылды. Негізгі саяси жаңашылдық ретінде 145 депутаттан тұратын, кеңейтілген өкілеттіктерге ие бір палаталы «Парламент – Құрылтай» құрылатыны, оның пропорционалды сайлау жүйесі арқылы қалыптасатыны және депутаттардың өкілеттік мерзімі 5 жыл болатыны атап өтілді. Кездесу соңында қатысушылар Конституциялық өзгерістерге оң көзқарас білдіріп, жаңа Конституцияны референдум арқылы қабылдаудың маңыздылығын ерекше атап өтті.
