Ол U-17, U-20 және U-23 санаттары бойынша жер-жаһанның үздіктерін шығарған.
Былтыр Сербияның Нови-Сад қаласында күрес түрлерінен U-23 жасқа дейінгілер арасында өткен әлем чемпионатына Түркістан облысының атынан үш бірдей спортшы қыз қатысты. Олар — Шұғыла Өмірбек (55 келі), Нилуфар Раимова (57 келі) және Шәмшиябану Тастанбек (72 келі). Аталған дүбірлі додада тек Шұғыла Өмірбек қана алтын медаль иеленіп, әлем чемпионы атанды. Үш бірдей арудың жеке бапкері — Нұржігіт Ерімбетов.
Ерімбетов Нұржігіт Сәрсенбекұлы 1987 жылы 11 маусымда Түркістан облысы, Бәйдібек ауданына қарасты Ақбастау ауылында дүниеге келген. Орта мектепті аяқтаған соң Түркістан қаласындағы Қожа Ахмет Ясауи атындағы Халықаралық қазақ-түрік университетіне оқуға түсіп, 2005-2009 жылдары «Дене шынықтыру және спорт» мамандығы бойынша білім алды. Кейін осы оқу орнында магистратураны тәмамдады (2010-2012 жж.).
Нұржігіт Ерімбетов 2014 жылдан бері Түркістан қаласындағы Әбдісалан Нұрмаханов атындағы олимпиадалық резервтің мамандандырылған балалар-жасөспірімдер спорт мектебінде жаттықтырушы болып қызмет атқарып келеді.
Шәкірттерінің жетістіктері:
U-23 World Championships: Шұғыла Өмірбек (Сербия, Нови-Сад-2025)
U-20 World Championships: Нилуфар Раимова (Ресей, Уфа-2021)
U-17 World Championships: Мадхия Усманова (Грекия, Афина-2025)
ҚР еңбек сіңірген жаттықтырушысы Нұржігіт Ерімбетовтің арманы қандай?
— «Армансыз адам — қанатсыз құспен тең», — дейді бапкер.
— Кез келген адамның өз арманы бар. Менің спорттағы ең үлкен арманым — Қазақстанда ересектер арасында әйелдер күресінен әлем, Азия және Олимпиада чемпиондарын тәрбиелеп шығару. Осы жолды бағындырып, бастаған ісімді соңына дейін жеткізсем, елімнің спорт тарихында атымды алтын әріппен қалдырғым келеді, — деді ол.
Оңтүстік Қазақстан облысы әлі бөлінбей тұрған кезеңде ҚР еңбек сіңірген жаттықтырушысы Анатолий Визирякин боксшы Бекзат Саттархановты небәрі төрт жылдың ішінде Олимпиада чемпионы деңгейіне жеткізді. Жиырма жасар Бекзаттың Сидней Олимпиадасындағы алтыны — сол кездегі Оңтүстік Қазақстан облысы спортшылары үшін алғашқы әрі әзірге жалғыз Олимпиада алтыны болып қалды.
Түркістандық жаттықтырушы Нұржігіт Сәрсенбекұлы Ерімбетов те Анатолий Визирякин салған сара жолды жалғап, Түркістан мен Шымкент өңірінен бір Олимпиада чемпионын тәрбиелеп шығарады деген сенім зор.
Айбек МҰХАНОВ
