Бүгін жазушы, журналист, қоғам қайраткері Нұрлыбек Саматұлы 60 жасқа толып отыр. Қаламгерді мерейлі жасымен шын жүректен құттықтай отырып, шығармашылық шабыт, толассыз ізденіс, жаңа көркем туындылар мен игі бастамалар тілейміз! — деп жазды Қазақстан Жазушылар Одағының ресми парақшасы.
Нұрлыбек Сафин — kiltmedia.kz сайтының да тұрақты авторы.
Нұрлыбек Саматұлы Сафин 1966 жылы 4 ақпанда Қызылорда облысы, Жалағаш ауданы, Темірбек Жүргенов атындағы ауылда дүниеге келген. Қызылорда педагогикалық институтының (қазіргі Қорқыт ата атындағы университет) «Қазақ тілі мен әдебиеті» бөлімін тәмамдаған. Әскер қатарында болып келгеннен кейін еңбек жолын оқытушылықтан бастап, кейін облыстық радио мен телеарнада тілші қызметтерін атқарды.
Әр жылдары республикалық «Ана тілі» газетінде бөлім меңгерушісі, «Жұлдыз», «Таң-Шолпан» әдеби-көркем журналдарында проза бөлімінің меңгерушісі қызметтерін атқарды. Қазіргі уақытта республикалық «Таң-Шолпан» әдеби-көркем, көпшілік журналының бас редакторы.
Қаламгер шығармашылығы поэзия, деректі проза, көркем әңгіме және детектив жанрларын қамтиды. Оның «Өлеңдер» (1997), «Алматыға келген қыз» (2002), «Сафи Өтебаев», «Орынбай Бердіғожин» деректі романдары, «Тәуелсіздік қырандары» (2021), «Шеңгелдің шешек атуы» (2024) атты әңгімелер жинақтары оқырманға кеңінен таныс. «Алматыға келген қыз?» деректі хикаятының негізінде көркем фильмге киносценарий жазылған.
Нұрлыбек Саматұлы — бірқатар республикалық және халықаралық әдеби байқаудың жүлдегері. Қазақстан Жазушылар одағының, Қазақстан Журналистер одағының мүшесі. ҚР Мәдениет және спорт министрлігінің «Мәдениет саласының үздігі» төсбелгісінің иегері, Қырғыз Республикасы Президентінің «Ардақ грамотасымен» марапатталған. ҚР Президентінің 2024 жылғы Жарлығымен «Құрмет» орденімен наградталған.
Қаламгерге шығармашылық табыс, мықты денсаулық, жаңа әдеби белестер тілейміз!
