Бірде Жүрсін Ерман ағамыз «Мұқағали Мақатаев» атындағы сыйлықты алғанда, Жүкеңнің ұялы телефонына Бауыржан Халиолла мынадай құттықтау жіберіпті:
Құтты болсын жазмыш па, әлде бұйрық па?
Құтты болсын қымызыңды құй жұртқа.
Бізде ертең жүреміз-ау таласып,
Жүрсін Ерман атындағы сыйлыққа!
Сонда Жүрсін ағамыз өлеңге өлеңмен жауап берейін деп:
Ғұмырым бар сабындай-ақ қамшының,
Өз биігін білу керек әр шыбын.
Жүрсін Ерман атындағы сыйлықты,
Ішкіштердің алуына қарсымын!
Осылайша Баукеңді тығырыққа тіредім ғой деп отырса, Бауыржаннан телефонына тағы бір смс келіпті:
Мен өзіңнен үйреніп ем ұрттауды,
Содан кейін жақпай қойдым жұртқа әлгі.
Қайран ғана қасиетті өмірім,
Қайдан ұстаз қылдың маған қырттарды.
Маған айтар сөзің осы болды ма?
Енді алдыңда ұстамаспын домбыра,
Бір ішкіштің алып тұрып сыйлығын,
Бір ішкішті табалауың зор күнә..., - деген екен.
