«Баршаңызды Ұлттық басылым күнімен құттықтаймын!
Қазақ баспасөзінің тағылымға толы тарихында бұл күннің маңызы ерекше. 1913 жылдың 2 ақпанында Әлихан Бөкейханұлы, Ахмет Байтұрсынұлы, Міржақып Дулатұлы секілді ұлт зиялыларының бастамасымен «Қазақ» газетінің алғашқы саны Орынбор қаласында жарық көрген болатын. Осыған орай, 2023 жылы Үкімет қаулысымен 2 ақпан – Ұлттық басылым күні болып бекітілді.
Осыдан бір ғасыр бұрын Қызылорда қаласы Қазақ елінің астанасы болған кезеңде ұлттық баспасөздің негізін қалаушылар Сыр өңіріне келіп, газет-журнал шығару ісін жалғастырды.
Мемлекет басшысымыз Қасым-Жомарт Кемелұлы жыл басында «Turkistan» газетіне берген сұхбатында: «Газет-журналдар қайта өрлеу дәуірінің бастауында тұр. Қазіргі таңда баспасөз заман талабына бейімделіп, ақпарат айдынынан өз орнын тауып отыр. Мен сүйікті Отанымыздың игілігі үшін барлық салада табысты еңбек етіп жүрген мықты азаматтар туралы мәліметтерді көбінесе газеттерден аламын», деген болатын.
Елдегі маңызды бастамаларды жұртшылыққа жеткізіп, жалпы адамзатқа ортақ ізгі құндылықтарды дәріптеуде баспасөз қызметкерлері кәсіби біліктіліктің, отаншылдық пен жауапкершіліктің озық үлгісін көрсетіп келеді.
Алдағы уақытта да халықтың бірлігін нығайтуға атсалысып, Әділетті, Таза Қазақстанды өркендетуге елеулі үлес қоса береді деп сенемін.
Шынайы ақпарат пен кәсіби журналистиканы дамытуға үлес қосып жүрген баспа саласы қызметкерлеріне мықты денсаулық, шығармашылық шабыт тілеймін!» — деді аймақ басшысы.
