Иранның сыртқы істер министрі Аббас Арагчи АҚШ-пен әскери қақтығыс қаупі сақталып отырғанын мойындай отырып, Тегеран Вашингтонмен ядролық бағдарлама бойынша келісімге келу мүмкіндігін әлі де жоққа шығармайтынын мәлімдеді. Бұл туралы ол CNN телеарнасына берген сұхбатында айтты.
Министрдің сөзінше, Иран тарапы АҚШ-ты келіссөздердегі сенімді серіктес ретінде қабылдаудан қалған. Соған қарамастан, аймақтағы достас елдер арқылы жүргізіліп жатқан жанама байланыстар диалогты қайта жандандыруға мүмкіндік беріп отыр.
«Өкінішке қарай, біз АҚШ-қа деген сенімді жоғалттық. Алайда аймақтағы әріптестер арқылы алмасып жатқан хабарламалар сындарлы келіссөздерге жол ашуы мүмкін», – деді Арагчи.
Оның айтуынша, келіссөздердің тікелей не жанама өтуі аса маңызды емес, бастысы – мазмұны мен нәтижесі.
«Диалог формасы емес, сенім шешуші рөл атқарады. Толық сенім ешқашан болмауы мүмкін, бірақ ең болмағанда белгілі бір деңгейдегі өзара түсіністік қажет», – дейді министр.
Әскери қақтығыс қаупіне қатысты сұраққа жауап берген Арагчи Иранның соғысқа дайын екенін ашық айтты. Алайда бұл Тегеран соғысты қалайды дегенді білдірмейтінін ерекше атап өтті.
«Соғысты болдырмауға болады. Біз оған толық дайынбыз, тіпті 12 күндік соғыс кезіндегіден де жақсы дайындалғанбыз. Бірақ дайын болу – соғысты қалау емес. Біздің мақсатымыз – қақтығыстың алдын алу», – деді ол.
Ядролық мәселе жөнінде министр нақты ұстанымын білдірді. Оның сөзінше, әділ әрі адал келісімге келуге әлі де мүмкіндік бар.
«Мүмкін емес талаптардан бас тартып, шынайы келісімге келу мүмкіндігін жіберіп алмау керек. Мұндай келісім ядролық қарудың болмауына нақты кепілдік беруі тиіс. Бұған қысқа мерзімде де қол жеткізуге болады», – деді Арагчи.
Сонымен қатар Иран санкциялардың алынуын және уранды бейбіт мақсатта байыту құқығының сақталуын талап ететінін тағы да қайталады.
Министр Тегеранның өз мүдделерін қорғауға әрдайым дайын екенін де жасырмады.
«Қақтығыс басталса, бұл барлығы үшін апат болады. Біз кез келген сценарийге дайынбыз. Қарулы күштеріміз өткен соғыспен салыстырғанда әлдеқайда жақсы жабдықталған», – деп түйіндеді ол.
