Мұндай сұмдық статистикалық деректерді eldala.kz аграрлық сайты жариялап отыр.
Бір ғана мысал, 2024 жылдың басында Қазақстанда 270 мың шаруа қожалығы болған, деп хабарлайды inbusiness.kz сайты.
Ал былтыр жыл соңында оның 24 мыңы жабылып, 245,8 мыңы ғана қалғаны белгілі болды. Бұл туралы ауыл шаруашылығының сарапшысы Төлеутай Рахымбеков хабарлаған.
Ол жағдайдың бұлай жалғасқанына қатты алаңдаушылық білдірді.
– Ел тәуелсіздігінің 35 жылдан аса уақытында алғаш рет шаруа қожалықтары санының азайғанын көріп отырмын. Айтпақшы, жеке қосалқы шаруашылықтардың (ЖҚШ) саны да кеміп келеді. Егер 2024 жылдың 1 қаңтарына 1 млн 631 мың болса, 2025 жылдың 1 қаңтарына 1 млн 605 мың бірлік ғана қалған, – дейді сарапшы.
Ол мал басының 90%-ы шаруа қожалықтары мен жеке шаруа қожалықтарында ұсталатынын және олар ішкі нарыққа сүт пен еттің 90%-ын жеткізетінін айтты. Демек, бұл шаруашылықтардың қысқаруы ішкі нарықта осы өнім көлемінің азаюына әкеліп, бағаларға қысым жасамақ.
– Өнімге деген сұраныс өзгеріссіз қалғанда, өнім ұсынысының азаюы және тіпті халық санының өсуіне байланысты артуы теңгерімсіздік тудырады, оны нарық ет пен сүт бағасын көтеру арқылы «түзетеді». Тек ет пен сүтке ғана емес… Сосын, тағы да, Қазақстандағы ет бағасының өсуіне сиыр еті өндірісін азайтуға батылы барған Аргентина мен Бразилияны кінәлаймыз ба? Немесе барлық кінәні Қазақстаннан ет экспортын арттырған Өзбекстан мен Тәжікстанға аударуымыз керек пе? Немесе басқа түсініктеме табамыз ба? – деп ашынады Төлеутай Рахымбеков.
